फोटो – BCCI/IPL

T20 क्रिकेटमध्ये यशस्वी होण्यासाठी फक्त पॉवर गेमची गरज नाही. क्रिकेटचे बेसिक घट्ट असेल तरी उत्तम स्ट्राईक रेटनं रन्स काढता येतात आणि टीमला मॅच जिंकून देता येते हे दाखवून देणाऱ्या ऋतुराज गायकवाडचा (Ruturaj Gaikwad) आज वाढदिवस. आजच्याच दिवशी ( 31 जानेवारी 1997) रोजी त्याचा जन्म झाला.

पुण्यात शिकला क्रिकेट!

ऋतुराज गायकवाड पुण्याचा. विद्येचे माहेरघर अशी ओळख असलेल्या पुण्याला क्रिकेटची देखील परंपरा आहे. महाराष्ट्राच्या रणजी टीमचं पुणे (Pune) मुख्यालय आहे. संपूर्ण महाराष्ट्राचा (Maharashtra) विचार केला तर मुंबईनंतर पुणे हे दुसऱ्या क्रमांकाचं क्रिकेट केंद्र. याच पुण्यात ऋतुराजनं क्रिकेटचं बेसिक घट्ट केलं. वयाच्या 19 व्या वर्षी म्हणजे 2016-17 मध्येच ऋतुराजची महाराष्ट्राच्या टीममध्ये निवड झाली. ओपनिंग किंवा नंबर 3 वर खेळू शकणाऱ्या ऋतुराजनं लवकरच स्वत:ला देशांतर्गत क्रिकेटमध्ये सिद्ध केलं. मागील दोन वर्षात देशांतर्गत क्रिकेटमधील 15 इनिंगमध्ये त्याने 105 च्या स्ट्राईक रेटनं 843 रन्स काढले. त्यामुळेच चेन्नई सुपर किंग्स (CSK) या आयपीएल टीमनं त्याला करारबद्ध केलं.

( वाचा : वाढदिवस स्पेशल : चेतेश्वर पुजारा, भारतीय टीमच्या भव्य इमारतीचे घावं सोसणारा पाया! )

2020 चा आयपीएल सिझन ऋतुराजला फक्त क्रिकेटर म्हणून नाही तर एक व्यक्ती म्हणूनही खूप काही शिकवून गेला. सीएसकेच्या सरावाच्या दरम्यान टीमचे मालक एन. श्रीनिवासन, कॅप्टन महेंद्रसिंह धोनी (MS Dhoni) या दोघांनाही त्याने प्रभावित केले होते. चायनीज व्हायरसमुळे आयपीएल स्पर्धा सुरुवातीला लांबणीवर पडली आणि नंतर भारताच्या ऐवजी यूएईमध्ये झाली.

ऋतुराज यूएईमध्ये दाखल होताच त्याला चायनीज व्हायरसची लागण झाली. त्याची चाचणी दोनदा पॉझिटीव्ह आल्याने त्याला तब्बल 22 दिवस सर्व सहकाऱ्यांपासून, क्रिकेटपासून दूर राहावे लागले. चायनीज व्हायरसमधून बरा झाल्यानंतर दोनच दिवसांनी त्याला अंबती रायडू (Ambati Rayudu) जखमी झाल्याने सीएसकेकडून मॅच खेळण्यासाठी मैदानात उतरावे लागले.

खराब सुरुवात

ऋतुराजला सीएसकेनं पहिल्या मॅचमध्ये मीडल ऑर्डरमध्ये खेळवलं. तो पहिल्याच मॅचमध्ये अगदी पहिल्याच बॉलवर आऊट झाला. दुसऱ्या मॅचमध्येही त्याला फक्त 5 रन्स काढता आले. त्यामुळे त्याला अंतिम 11 मधून वगळण्यात आलं. सीएसकेसाठी 2020 चे आयपीएल निराशाजनक ठरले. सततच्या पराभवामुळे अखेर सीएसकेने शेवटच्या मॅचमध्ये तरुण खेळाडूंना संधी देण्याचे ठरवले. मुंबई इंडियन्स विरुद्धच्या मॅचमध्ये ऋतुराज त्याच्या नेहमीच्या जागेवर म्हणजेच ओपनिंगला आला. तिसऱ्या इनिंगमध्येही तो अपयशी ठरला. ट्रेंट बोल्टने त्याला शून्यावरच माघारी धाडलं. ऋतुराजचं 2020 च्या आयपीएलमधील ते शेवटचं अपयश होतं.

( वाचा : वाढदिवस स्पेशल : अक्षर पटेल, हिंमतवाला बॉलर! )

झोकात कमबॅक

त्यानंतरच्या तीन मॅचमध्ये त्याने अनुक्रमे 65, 72 आणि 62 असे रन्स काढले. टार्गेटचा पाठलाग करताना ऋतुराजनं या तिन्ही हाफ सेंच्युरी झळकावल्या. या तिन्ही मॅचमध्ये सीएसकेनं विजय मिळवला. तीनपैकी दोनदा नाबाद राहत आपल्यामध्ये इनिंगची यशस्वी सांगता करण्याची क्षमता असल्याचं ऋतुराजनं दाखवून दिलं.

ऋतुराजच्या या खेळीनं अनेक क्रिकेटपटूंना प्रभावित केले आहे. ‘त्याची बॅटिंग पाहण्यास आनंद होतो’, अशी भावना सुनील गावस्कर यांनी व्यक्त केलीय. शेन वॉटसनला (Shane Watson) तो ‘यंग सुपरस्टार’ वाटतो तर ऋतुराजचा प्रेशर गेममधील खेळ पाहून फाफ ड्यू प्लेसिसला (Faf du Plessis) तरुण विराट कोहलीची आठवण झाली!

दिल्ली कॅपिटल्स विरुद्धच्या पराभवानंतर टीममधील तरुण खेळाडूंमध्ये स्पार्क दिसत नसल्याची तक्रार कॅप्टन महेंद्रसिंह धोनीनं केली होती. ऋतुराजनं त्याची ही तक्रार लागोपाठ तीन चांगल्या इनिंग करत दूर केली.  

( वाचा : IPL 2021- CSK साठी पुढच्या वर्षीही ‘रैना है ना’! )

सीएसकेला 2020 मध्ये पहिल्यांदाच आयपीएल स्पर्धेची बाद फेरी गाठण्यात अपयश आलं. त्यांच्या टीममधील बहुतेक खेळाडू हे कारकीर्दीच्या उत्तरार्धात आहेत. त्यांच्या खेळातील इंधन संपल्याने सीएसकेची आयपीएलमधील गाडी लवकर सुरु झाली नाही. आता टीमची तरुण खेळाडूंना घेऊन नव्याने बांधणी करण्याचे संकेत कॅप्टन धोनी आणि कोच स्टिफन फ्लेमिंगनं दिले आहेत. नव्या सीएसकेमध्ये मराठमोळ्या ऋतुराजचा महत्वाची भूमिका असेल. महाराष्ट्राची ‘शान’ आणि चेन्नईचा ‘स्पार्क’ बनलेल्या ऋतुराज गायकवाडसाठी हे वर्ष खूप महत्वाचे असणार आहे. या वर्षातील सर्व पेपरसाठी त्याला खूप खूप शुभेच्छा!

व्हॉट्सअप अपडेट्स

‘Cricket मराठी’वरील बातम्यांचे मोफत अपडेट्स तुमच्या व्हॉट्सअपवर वाचण्यासाठी 9920277596 या नंबरवर आम्हाला तुमचे नाव, स्पेस आणि Subscribe असा मेसेज करा.